Fangageymslur á höfuðborgarsvæðinu eru fullar eftir gærkvöldið og nóttina en alls voru bókuð 67 mál í kerfum lögreglu á tímabilinu. Fjölmargir aðrir ökumenn voru handteknir grunaðir um akstur undir áhrifum fíkniefna eða áfengsi. Hér má sjá brotabrot af því sem lögreglan aðhafðist.

Alls kannaði lögreglan 250 ökumenn með því að setja upp ölvunarpóst en þrír þeirra reyndust aka undir áhrifum fíkniefna.

Tilkynning barst um víðáttuölvaðan einstakling í miðborginni en hann reyndist vera hér í ólögmætri dvöl og var hann vistaður í fangaklefa í þágu rannsóknar málsins.

Leigubílstjóri óskaði eftir aðstoð lögreglu vegna fólks sem neitaði að greiða fyrir farið. Þegar lögreglan kom á vettvang var fólkið horfið á braut en málið er í rannsókn.

Aðstoð lögreglu var óskað vegna innbrots en þjófarnir voru enn á vettvangi. Voru tveir handteknir og vistaðir í fangaklefa í þágu rannsóknar málsins.

Pöddufullum og ósjálfbjarga einstaklingi var ekið heim til sín.

Þá var ökumaður bifreiðar stöðvaður við akstur við venjulegt umferðareftirlit en hann var handtekinn grunaður um akstur undir áhrifum ávana- og fíkniefna og lyfja og sviptur ökuréttindum á staðnum. Neitaði hann einnig að veita atbeina við rannsókn málsins en hann var laus að lokinni sýnatöku.

Lögreglan sem annast verkefni í Hafnarfirði, Garðabæ og á Álftanesi stöðvaði ökumann bifreiðar við hefðbundið umferðareftirlit. Reyndist hann vera undir áhrifum ávana- og fíkniefna og lyfja og var sviptur ökuréttindum undir eins og kærður fyrir skjalafals og fyrir að nota ekki öryggisbelti. Kom svo í ljós að maðurinn reyndist einnig eftirlýstur. Var honum stungið í steininn.

Lögreglan sem starfar í Kópavogi og í Breiðholtinu handtók ökumann bifreiðar, sem þeir grunuðu um akstur undir áhrifum ávana- og fíkniefna og lyfja, og sviptu hann ökuréttindum. Þá reyndist hann vera með fíkniefni í fórum sínum og hafa brotið vopnalög, án þess að það sé útskýrt nánar í dagbók lögreglunnar. Var hann laus að lokinni sýnatöku.

Óskað var eftir aðstoð lögreglu vegna yfirstandandi slagsmála í heimahúsi þar sem úðavopni var beitt á brotaþola. Fjórir aðilar voru handteknir vegna rannsóknar málsins.

Lögreglan sem annast útköll í Grafarvogi, Mosfellsbæ og Árbæ stöðvaði þrjá ökumenn fyrir of hraðan akstur en einn þeirra reyndist án gildra ökuréttinda.

Þá var ökumaður bifreiðar stöðvaður við akstur, grunaður um að aka undir áhrifum ávana- og fíkniefna og lyfja og var handtekinn. Þá reyndist hann án gildra ökuréttinda sem og vera ólöglega í landinu og eftirlýstur. Var hann því vistaður í fangaklefa.