Knattspyrnumaðurinn fyrrverandi Eiður Smári Guðjohnsen hefur komið víða við á ferlinum og meðal annars í auglýsingum.

Margir muna eftir auglýsingu sem landsliðsmaðurinn fyrrverandi lék í fyrir Coca Cola þar sem hann lék listir sínar vítt og breitt um höfuðborg Íslands.

Nú hefur veðmálafyrirtækið Epicbet, sem ekki hefur starfsleyfi á Íslandi, birt nýja auglýsingu fyrir fyrirtækið og hlaðvarpið Dr. Football, sem Hjörvar Hafliðason stjórnar. Þar er greint frá því að Eiður muni ganga til liðs við hlaðvarpið en helsti styrktaraðili þess er Epicbet. Auglýsing endar svo á merki Epicbet. Þá hefur verið búin til knattspyrnutreyju með merki Dr. Football og Epicbet, sem er sýnd í auglýsingunni.

Við auglýsinguna skrifar veðmálafyrirtækið svo „Eiður Smári Gudjohnsen er Epic.“

Hefur sjálfur tapað háum fjárhæðum

Auglýsingin vekur sérstaklega athygli í ljós þessi að Eiður Smári hefur í gegnum árin verið opinskár um veðmálafíkn sína. Árið 2023 fagnaði Eiður reglubreytingu hjá ensku úrvalsdeildinni sem bannar veðmálafyrirtækjum að auglýsa framan á treyjum liða í deildinni.

„Hver einasti fótboltaaðdáandi, öll börn í heiminum, eru með augun límd við treyjur stærstu félaganna á hverjum degi. Treyjuauglýsing sendir sterk skilaboð og auglýsingar hafa mikil áhrif,“ sagði Eiður um bannið. „Þetta hefur áhrif á alla vegna þess að við sjáum þetta í sjónvarpinu, á auglýsingaskiltum og fótboltatreyjum. Þetta hefur orðið hluti hversdagslegs veruleika og ég held að bannið sendi mikilvæg og jákvæð skilaboð,“

Í viðtalinu sem Daily Mirror tók við Eið segir að hann hafi tapað rúmum milljarði króna á ævinni vegna spilafíknar.

„Fótboltamenn finna fyrir yfirgnæfandi pressu að standa sig og vera upp á sitt besta öllum stundum. Það getur haft mikil áhrif þegar hlutirnir ganga ekki sem skyldi. Þá áttu kannski til að leita í annað til að fá adrenalín eða slíkt. Fyrir suma geta það verið veðmál, aðrir snúa sér að flöskunni eða eitthvað annað sem á að verka sem skyndilausn,“ hélt Eiður áfram.

„Það er aðeins þegar þú áttar þig á því að engin slík skyndilausn er til sem þú byrjar að leita þér hjálpar.“

Starfa án leyfis

Umræða um veðmálastarfsemi á Íslandi hefur aukist á undanförnum árum og þá sérstaklega í ljósi þess að upp hafa sprottið veðmálafyrirtæki sem skráð eru erlendis en starfa á landinu án starfsleyfis.

„Veðmálafíkn er fyrst og fremst samfélagslegt vandamál, sem a.m.k. íþróttahreyfingin er meðvituð um, og miðað við þær upplýsingar sem liggja fyrir þá eru ungir karlmenn stór hluti þess hóps sem stundar veðmál,“ sagði Eysteinn Pétur Lárusson, framkvæmdastjóri KSÍ, við Mannlíf um málið í febrúar.

„Það skiptir miklu máli að fyrirtæki sem bjóða upp á veðmál hafi skýra stefnu um ábyrga spilun og beini fólki ekki í hættulegan farveg. Á sama tíma og meirihluti þeirra sem veðja hafa stjórn á sinni spilun og nýta hana jafnvel í félagslegum tilgangi getum við ekki horft fram hjá dekkri hliðum hennar,“ skrifaði Willum Þór Willumsson, forseti íþrótta- og Ólympíusambands, Íslands í júlí.