Alls gista níu aðilar nú fangageymslu lögreglunnar á höfuðborgarsvæðinu eftir nóttina. Skráð voru 75 mál í kerfum lögreglunnar á tímabilinu frá 17:00 í gær og til 05:00 í morgun. Þetta kemur fram í dagbók lögreglunnar. Hér fyrir neðan má sjá nokkur dæmi um verkefni lögreglunnar á tímabilinu.

Lögreglunni sem starfar í Austur- og Vesturbæ Reykjavíkur, Seltjarnarnesi og í miðbæ Reykjavíkur, barst tilkynning um tvo þjófa á hóteli. Voru mennirnir sótölvaðir og hlýddu ekki fyrirmælum lögreglunnar. Voru þeir handteknir og er málið í rannsókn. Önnur tilkynning barst vegna manns sem lét illa og dundaði sér við að skemma sameign. Var hann vistaður í fangaklefa en málið er í rannsókn.

Sömu lögreglu barst einnig tilkynning um fáklæddan mann sem beraði sig á almannafæri. Ekki fylgdi sögunni hvort lögreglan hefði haft hendur í hári mannsins.

Þá var hópur manna með ólæti á skemmtistað í miðbænum en ekki stendur stafur um framhaldið í dagbók lögreglunnar. Á öðrum skemmtistað hafði pöddufullur maður unnið eignarspjöll en maðurinn var handtekinn og látinn gista fangaklefa.

Tilkynning barst lögreglunni um mann sem datt og hlaut skurð á höfuð. Sjúkraflutningamenn voru sendir á staðinn.

Lögreglunni sem sér um Hafnarfjörð, Garðabæ og Álftanes, barst tilkynning um sofandi mann á veitingastað. Var hann vakinn og gert að yfirgefa veitingastaðinn. Sama lögregla var kölluð að heimahúsi þar sem læti voru. Var húsráðanda gert að lækka í sér.

Þá barst lögreglunni tilkynning um líkamsárás en einn aðili var handtekinn í kjölfarið. Málið er í rannsókn.

Lögreglan sem vaktar Kópavog og Breiðholt var kölluð að heimahúsi þar sem óvelkominn aðili var en honum var gert að hypja sig.

Einnig var tilkynnt um æstan mann fyrir utan bar sem var að stofna til slagsmála og veitast að dyravörðum.

Lögreglan sem vinnur í Grafarvogi, Mosfellsbæ og Árbænum barst tilkynning um eld í ökutæki en slökkvilið var kallað út. Þá hafði sama lögregla afskipti af ökumanni sem hafði ekið út af veginum og tekið niður ljósastaur í leiðinni. Reyndist hann drukkinn og var hann vistaður í fangaklefa.

Víðsvegar um borgina bárust tilkynningar um ýmsa hluti sem fuku í hvassviðrinu, þar á meðal stillans, skilti, kerru og þakplötur.