Ónafngreindur karlmaður hefur verið dæmdur í 30 daga skilorðsbundið fangelsi af Héraðsdómu Reykjavíkur fyrir að ráðast á tvo lögreglumenn.

Viðkomandi var ákærður fyrir brot „gegn valdstjórninni aðfaranótt sunnudagsins 8. september 2024, þegar hann veittist að lögreglumönnum með ofbeldi, innandyra í fangaklefa lögreglustöðvarinnar við Hringbraut 130 í Reykjanesbæ, sem voru við skyldustörf, með því að hafa veitt lögreglumanni A högg í andlitið með handarbaki hægri handar, með þeim afleiðingum að lögreglumaðurinn fékk högg í nef og kinn og slegið lögreglumann B í andlitið með olnboga hægri handar, með þeim afleiðingum að lögreglumaðurinn hlaut bólgu og fleiður, innan á neðri vör.“

Árásarmaðurinn játaði brot sitt en krafðist þess að honum yrði ekki gerð refsing. Í dómnum er sagt að það ungur aldur hans sé honum til málsbóta og skýlaus játning fyrir dómi og það að hann sýndi iðrun. Á hinn bóginn verði ekki litið fram hjá því að brot ákærða beindist að tveimur lögreglumönnum sem voru við skyldustörf, en samkvæmt gögnum málsins voru afleiðingar þess þó ekki alvarlegar.

Dómurinn er skilorðsbundinn til tveggja ára og þarf hinn seki að greiða allan sakarkostnað málsins, sem eru 32.562 krónur.