Rannsókn lögreglu á andláti Hans Roland Löf er í fullum gangi en hann lést 11. apríl eftir atvik sem kom upp á heimili hans í Súlunesi í Garðabæ.

Að sögn lögreglu er mikil vinna í gangi varðandi gagnaöflum og fleira í þeim dúr. Er það gert til að fá skýra mynd af andláti Hans. Samkvæmt upplýsingum sem birst hafa í fjölmiðlum var Hans meðvitundarlaus þegar viðbragðsaðilar komu á staðinn en hann var úrskurðaður látinn eftir að hann var fluttur á sjúkrahús.

Margrét Halla Hansdóttir Löf, dóttir hins látna, var í kjölfarið úrskurðuð í gæsluvarðhald, sem var svo framlengt til 7. maí, og er hún með réttarstöðu sakbornings.

Í viðtali við Heimildina sögðu tveir hestamenn að þeir hafi orðið vitni að ofbeldi Margrétar í garð foreldra sinna. Þannig lýsti einn sjónarvottur því að hann hefði orðið vitni að undarlegum atburðum inni í bifreið. Móðir konunnar sat þar og virtist sem dóttirin væri að reyna að faðma hana inni í bílnum. Þegar vitnið hafi nálgast bifreiðina hafi komið í ljós að dóttirin lét höggin dynja á móður sinni.

Í öðru tilvikinu hafi annað vitni síðar heyrt öskur og „séð dótturina lemja föður sinn með krepptum hnefa“.

Lögreglan vill ekkert segja um dánarorsök mannsins að svo stöddu og tekur fram að málið sé viðkvæmt.

Hans Löf starfaði áður sem tannsmiður, en átti áttræðisafmæli daginn sem hann lést. Hann bar bæði gamla og nýja áverka. Eiginkona hans, og móðir konunnar sem situr í gæsluvarðhaldi, var sömuleiðis flutt á sjúkrahús til aðhlynningar.