Game of Thrones leikkonan Natalie Dormer hefur sagt að hún muni ekki taka þátt í kynningu á væntanlegri dramaþáttaröð ITV og Britbox, The Lady, þar sem hún fer með hlutverk Söru Ferguson, hertogaynjunnar af Jórvík.

Ákvörðunin kemur í kjölfar uppljóstrana um tengsl Ferguson við látna barnaníðinginn Jeffrey Epstein. Dormer greinir jafnframt frá því að hún hafi gefið alla launagreiðslu sína fyrir verkefnið til góðgerðarsamtaka sem vinna gegn barnaníði.

Fréttirnar birtust eftir að tölvupóstur frá 2011 var opinberaður nýlega, þar sem Ferguson, fyrrverandi eiginkona Andrésar prins, virtist biðja Epstein afsökunar fyrir að hafa opinberlega hafnað honum eftir að hann afplánaði dóm árið 2008 fyrir kynferðisbrot.

„Þú hefur alltaf verið staðfastur, gjafmildur og einstakur vinur minn og fjölskyldu minnar,“ skrifaði hún, aðeins nokkrum vikum eftir að hafa lýst viðskiptum sínum við Epstein í blaðaviðtali, þar á meðal lántöku hjá honum, sem „gríðarlegu dómgreindarleysi“ og að hún myndi „aldrei nokkurn tíma eiga frekari samskipti við Jeffrey Epstein.“

Í tölvupóstinum sem lekið var, segir Ferguson að hún „biðjist auðmjúklega afsökunar“ og viti að Epstein hafi „fundist hún hafa brugðist sér hryllilega.“

The Lady, framleidd af Left Bank Pictures (þekkt fyrir The Crown), er að hluta byggð á raunverulegum atburðum. Hún segir frá uppgangi og falli Jane Andrews (leikinn af Miu McKenna-Bruce), sem starfaði fyrir Ferguson áður en hún var dæmd fyrir morð á kærasta sínum, Thomas Cressman (Ed Speleers), árið 2001. Þættirnir, sem eru fjórir talsins, voru teknir upp fyrr á þessu ári og stefnt er að frumsýningu seint 2025 eða snemma 2026.

„Þegar ég tók hlutverkið í The Lady vissi ég að það að túlka Söru Ferguson myndi krefjast blæbrigða. Fólk er marglaga, lífshlaup þeirra einkennast af hæðum og lægðum, og sem leikari er mitt hlutverk að miðla þeim þáttum af heiðarleika og samkennd,“ sagði Dormer í yfirlýsingu til Variety. „Síðan verkefninu lauk hafa nýjar upplýsingar komið fram sem gera mér ómögulegt að samræma eigin gildi við hegðun Söru Ferguson, sem ég tel óafsakanlega. Af þeirri ástæðu mun ég ekki taka þátt í kynningu þáttanna.“

Dormer bætti við: „Í samræmi við skuldbindingu mína við velferð barna hef ég gefið öll laun mín fyrir þetta verkefni til samtakanna NAPAC (National Association for People Abused in Childhood) og Centre of Expertise on Child Sexual Abuse (sem starfar undir Barnardo’s).“

Hún tók einnig fram að ákvörðunin endurspegli ekki samstarfið við Left Bank. „Þau eru einstakt framleiðslufyrirtæki að vinna með og ég er þakklát fyrir tímann sem við áttum saman.“

Í kjölfar uppljóstrananna hafa fjölmörg góðgerðarsamtök slitið tengslum við Söru Ferguson sem verndara eða talsmann. Þar á meðal eru Teenage Cancer Trust, The Children’s Literacy Charity og British Heart Foundation.

Þegar tölvupóstarnir voru birtir greindi talsmaður hertogaynjunnar frá því, samkvæmt BBC, að þeir hefðu verið sendir til að bregðast við hótunum Epstein um meiðyrðamál. Þá sæi hún enn eftir samskiptum sínum við hann.

„Þessi tölvupóstur var sendur í kjölfar ráðlegginga sem hertogaynjunni bárust til að reyna að róa Epstein og hótanir hans,“ sagði í yfirlýsingu.