Blíðviðrisdagarnir í maí eru mesta hitabylgja sem vitað er um í mánuðinum á Íslandi.

Hiti mældist 20 stig eða meira á landinu heila 11 daga í maí; jörð var alauð og þurr allan mánuðinn; bæði í Reykjavík sem og á Akureyri.

Þetta og fleira er á meðal þess sem fram kemur í samantekt Veðurstofunnar um veðrið í maí.

Sólskin fylgdi hitabylgjunni; sérlega sólríkt var á Akureyri í mánuðinum: Þar mældust 255,5 sólskinsstundir, eða 84,5 fleiri stundir miðað við meðallag áranna 1991 til 2020.

Einungis þrisvar sinnum hafa mælst fleiri sólskinsstundir í maímánuði á Akureyri frá upphafi mælinga.

Í höfuðborginni mældust sólskinsstundirnar 264,7, - 55,7 stundum yfir meðallagi.

Yfir landið allt var þetta hlýjasti maímánuður frá upphafi mælinga, á langflestum veðurstöðvum landsins.

Meðalhiti maímánaðar var hæstur á Akureyri; 10,1 stig - 3,5 stigum yfir meðallagi síðustu 10 ára og jafnframt hæsti mánaðarhiti sem mælst hefur á Íslandi í maí.

Meðalhiti í Reykjavík mældist 9 gráður - 2,3 stigum yfir meðallagi síðusta áratugs.

Þá var sett nýtt hitamet í maí á landsvísu er hitinn fór í 26,6 stig á Egilsstaðaflugvelli þann 15. maí. Fyrra met var 25,6 stig sem mældist á Vopnafirði þann 26. maí árið 1992.

Hitabylgjan mikla dagana 13.-22. maí náði yfir allt landið; er klárlega sú mesta sem vitað er um hér á landi í maímánuði.

„Það var merkilegt hversu snemma árs hitabylgjan átti sér stað, hversu lengi hún stóð og hversu útbreidd hún var,“ segir í samantekt Veðurstofunnar um veðurfar í maí.

Hlýindin miklu náðu hápunkti 17. og 18. maí er hitinn mældist 20 stig eða meira á um helmingi allra veðurstöðva landsins.

„Tíð var einmuna góð í mánuðinum, það var sólríkt, hægviðrasamt og allur gróður var óvenjulega snemma á ferð. Töluverðir vatnavextir voru í ám á Norðurlandi í byrjun mánaðar vegna leysinga í hlýindunum,“ segir í samantekt Veðurstofunnar um veðurfar í maí.

Hiti mældist 20 stig eða meiri einhvers staðar á landinu 11 daga í maí, þar af 10 daga í röð. Slíkir dagar hafa verið tvisvar til þrisvar að meðaltali í maí síðastliðin ár, og í raun er ekkert algilt að slíkir dagar komi í maí.