Það sem af er árinu hafa tæplega 200 mál komið á borð Lögreglunnar á höfuðborgarsvæðinu er tengjast netglæpum en greint er frá þessu í tilkynningu frá henni.

Það gera rúmlega 33 mál í hverjum mánuði, en miðað við reynslu hérlendis og á Norðurlöndunum má telja að fæst slíkra mála séu tilkynnt til lögreglu.

Þá vill lögregla einnig vara við fjárfestingasvikum þar sem enn ber á tilkynntum málum þar sem fólk ætlar að fjárfesta í rafmyntum og brotamennirnir bjóðast til að aðstoða og óska eftir að fólk hlaði forriti inn í símann sinn eða inn í tölvuna sína.

Þá er lögregla sömuleiðis að fá tilkynningar um að fólk sé beðið um að samþykkja rafræn skilríki án þess að vera sjálft að reyna skrá sig inn og þess vegna áréttir lögregla að fólk skrái aldrei inn rafrænu skilríki sín nema vera 100% viss um upprunann. Þess ber líka að geta að til að taka á móti greiðslum er engin þörf á að samþykkja rafræn skilríki.

Samkvæmt lögreglunni hefur hún hefur fengið tilkynningar og kærur frá fyrirtækjum sem eru að fá tölvupósta, m.a. þar sem brotamenn komast inn í tölvupóstsamskipti milli söluaðila og kaupanda og senda falsaða reikninga eða breyta bankaupplýsingum vegna reikninga.

Að sögn lögreglu eykst fjöldi netglæpa yfir sumartímann.

Lögreglan vill hvetja fólk sem telur sig hafa orðið fyrir netglæp að setja sig í samband við lögreglu og viðskiptabanka sinn sem allra fyrst.