The Times of Israel greinir frá því að öryggisráð Ísraels hafi samþykkt tillögu varnarmálaráðherrans, Israel Katz, um að stofna opinbera stofnun sem muni hafa umsjón með flutningi Palestínumanna frá Gazaströndinni.

Í yfirlýsingu frá ísraelska varnarmálaráðuneytinu segir að stofnunin muni bera ábyrgð á að tryggja för íbúa Gaza „til sjálfviljugrar brottfarar til annarra ríkja, þar á meðal að tryggja ferðir þeirra, koma á fót ferðaleiðum, framkvæma öryggisskoðanir á göngufólki við tilgreinda landamærastaði á Gazaströndinni, auk þess að samræma aðgang að innviðum sem munu gera fólki kleift að ferðast um land, sjó og loft til áfangalandanna.“

Ráðuneytið hélt því fram að aðgerðin væri „háð ísraelskum og alþjóðlegum lögum og í samræmi við framtíðarsýn Donalds Trump, Bandaríkjaforseta.“

Trump hefur áður lagt til að Gazaströndin yrði tæmd af íbúum sínum til að „þróa“ svæðið undir bandarískri stjórn. Palestínumenn á Gaza hafa hafnað þessari tillögu og lýst henni sem þjóðernishreinsun, en arabísk ríki hafa stutt móttillögu Egyptalands um enduruppbyggingu Gaza án þess að íbúar þess verði fluttir á brott.