Ísland er áfram efst á lista Alþjóðaefnahagsráðsins (e. World Economic Forum) yfir jafnrétti kynjanna sem birtist í gær en greint er frá þessu í tilkynningu stjórnarráðinu.

Ísland hefur vermt efsta sætið frá árinu 2009 og hefur sýnt nokkuð jafna og jákvæða þróun frá 2006.

„Ísland er eina landið í heiminum sem nær yfir 90 prósentustig. Þetta er frábær árangur sem þakka má þrotlausri og samhentri vinnu þvert á samfélagið okkar. Frammistaða okkar byggir einkum á árangri í stjórnmálalegri valdeflingu kvenna og hefur Ísland nú lokað 95,4% kynjabilsins a því sviði, sem nemur fjórföldu alþjóðlegu meðaltali,“ sagði Þorbjörg Sigríður Gunnlaugsdóttir, dómsmálaráðherra og ráðherra jafnréttismála, um árangurinn.

„Því miður hefur árangur sveiflast nokkuð á sviði atvinnutækifæra, sem í ár mældist 79,8 stig sem er allnokkuð lægra en þau 84,6 stig sem við mældumst með árið 2021. Lækkunin stafar aðallega af minni áætluðum tekjum kvenna og fækkun kvenna meðal þingmanna, embættismanna og stjórnenda. Þá má einnig greina neikvæða þróun í heilbrigðismálum, þar sem skorið fer úr 97% árið 2016 í 96% árið 2025. Þetta er eitthvað sem við þurfum að skoða sérstaklega og athuga hvar hægt sé að gera betur,“ sagði ráðherrann að lokum.

Listi Alþjóðaefnahagsráðsins mælir stöðu jafnréttismála í 148 löndum og var fyrst birtur árið 2006 en miðað við þróunina stefnir í að fullt jafnrétti náist ekki fyrr en eftir 123 ár.