Frönsk kona á sextugsaldri er grunuð um að hafa ráðið dóttur sinni og eiginmanni sínum bana á hótelherbergi á Edition í Reykjavík í morgun.

Var konan með alvarlega stunguáverka er lögreglu bar að garði og er konan í haldi lögreglu.

Þetta herma heimildir fréttastofu Vísis.

Eins og fram hefur komið á Mannlífi fundust tveir erlendir ferðamenn látnir á hótelinu Edition í miðbæ Reykjavíkur í morgun.

Kemur fram hjá Vísi að einn ferðamaður til viðbótar hafi verið á vettvangi er lögreglu bar að garði, og var viðkomandi með mjög alvarlega áverka, og strax fluttur undir læknishendur.

Samkvæmt sömu heimildum er um að ræða franska konu á sextugsaldri, sem er grunuð um að hafa banað dóttur sinni og eiginmanni með einhverskonar eggvopni og hinn grunaði og þeir látnu eru með franskt ríkisfang og á aldursbilinu 20 til 60 ára.

Talið er að atvikið hafi gerst inni á hótelherbergi - en morgun var fjórðu hæð hótelsins lokað á meðan á lögregluaðgerðin stóð.

Mannlíf var á svæðinu í morgun og var hótelgestum brugðið við tíðindin en fáir vissu hvað hafði átt sér stað.