Neyslurými verða nú í nýrri mynd eftir að Alþingi samþykkti nýtt frumvarp Ölmu D. Möller, heilbrigðismálaráðherra. Hingað til hafa skaðaminnkandi neyslurými eingöngu verið ætluð þeim sem nota vímuefni í æð en með breytingunum geta skjólstæðingar nýtt þær aðferðir sem þau kjósa.

Heilbrigðisstofnanir og frjáls félagasamtök fá nú að stofna og reka neyslurými en sveitarfélög voru áður þau einu með heimild til þess. Í skýrlsu starfshóps um stefnu og aðgerðir í skaðaminnkun kemur fram að sveitarfélög eru mislangt komin að taka upp skaðaminnkandi þjónustu. Vonast er til að með hjálp heilbrigðisstofnana og frjálsra félagasamtaka verði öryggi fólks tryggt með greiðari aðgang að neyslurýmum.

„Breytingarnar geta jafnframt haft jákvæð áhrif á heilbrigðiskerfið, m.a. með færri veiru- og bakteríusýkingum, styttri legutíma á sjúkrahúsum, snemmbúnum inngripum og minni lyfjakostnaði vegna meðferðar, t.d. við HIV og lifrarbólgu C. Loks má gera ráð fyrir samfélagslegum áhrifum með fjölgun neyslurýma sem felast m.a. í hreinlæti og öryggi á almenningsstöðum. Ávinningurinn verður einnig að bregðast við á heildrænni hátt við vímuefnanotkun fólks og í því felst virðing við notendur og inngilding í samfélagið,“ segir í fréttatilkynningu frá Heilbrigðismálaráðuneytinu.