Fjórir ungir menn sem slösuðust alvarlega í bílslysi á Siglufjarðarvegi við Grafará, suður af Hofsósi, eru nú allir á gjörgæsludeild Landspítalans. Þetta staðfesti Pétur Björnsson, yfirlögregluþjónn á Norðurlandi vestra við RÚV.

Slysið varð um hálfníuleytið í gærkvöld, þegar bíllinn sem þeir voru í fór útaf veginum. Einn var fluttur á Landspítalann með þyrlu Landhelgisgæslunnar og hinir þrír með sjúkraflugi.

Piltarnir voru á leið í samkvæmi á Hofsósi ásamt öðrum ungmennum þegar slysið átti sér stað. Um 30 ungmenni voru á vettvangi og fengu þau áfallahjálp frá björgunarsveitum og Rauða krossinum.