Fasteignafélagið Bergey hefur nú keypt Herkastalann við Kirkjustræti 2 er áður hýsti höfuðstöðvar Hjálpræðishersins í meira en 100 ár - allt frá því húsið var reist.

Hyggst Bergey þróa eignina áfram til framtíðar; þar skal gera hótel, en Herkastalinn hefur verið rekinn sem gistiheimili á síðustu árum; eru þar nú 54 herbergi.

Bergey hefur samið við rekstraraðila er taka við rekstrinum og segir fasteignafélagið að hér sé um að ræða aðila með mikla reynslu af rekstri gistiheimila í miðborg Reykjavíkur.

„Herkastalinn er án efa ein fallegasta bygging Reykjavíkur og á sér merkilega sögu. Bergey hefur metnað til að hlúa vel að slíkum byggingum og við sjáum mikil tækifæri í bæði staðsetningu og húsinu sjálfu. Við ætlum að vanda okkur í vinnunni fram undan og sjáum fyrir okkur hótelrekstur og fjölbreytta starfsemi í húsinu á næstu árum,“ segir Magnús Berg Magnússon, stjórnarformaður Bergeyjar í samtali við VB.

Þetta fallega hús við Kirkjustræti 2 var reist árið 1916 eftir teikningum Einars Erlendssonar arkitekts; talið fyrsta stórvirki hans í steinsteypu.

Húsið var upphaflega tvílyft, en árið 1929 var tveimur hæðum bætt ofan á, en húsið er 1.405 fermetrar að stærð og skiptist í kjallara, þrjár hæðir og rishæð. Það er friðað að utan vegna menningarlegs og sögulegs gildis.

Kaup Herkastalans eru í samræmi við stefnu Bergeyjar þess efnis að eignast og endurvekja sögufrægar byggingar í miðborg Reykjavíkur.