Röskva, samtök félagshyggjufólks við Háskóla Íslands, hélt sinn árlega aðalfund í gærkvöldi, miðvikudagskvöldið 22. apríl, í safnaðarheimili Neskirkju. Þar var kjörin ný stjórn hreyfingarinnar til eins árs og var Ármann Leifsson, 22 ára kennaranemi, kjörinn nýr forseti Röskvu. Þetta kemur fram í fréttatilkynningu frá Röskvu.

Fram kemur í tilkynningunni að Ármann hafi verið virkur í félagslífi og stúdentapólitík um nokkurt skeið og hafi meðal annars verið kosningastjóri Röskvu í nýafstöðnum kosningum til Stúdentaráðs HÍ. Segist hann ætla að efla samheldni innan hreyfingarinnar og tryggja að Röskva haldi áfram að vera skýr rödd stúdenta innan og utan háskólans.

„Ég vil skemmtilega Röskvu sem heldur góðu jafnvægi milli stemmingar og málefna. Við ætlum að halda áfram að vera valdeflandi vettvangur fyrir öll þau sem vilja leggja sitt af mörkum í baráttunni fyrir jöfnuði og bættri stöðu stúdenta,“ segir Ármann.

Þá var María Björk Stefánsdóttir, 21 árs efnaverkfræðinemi, kjörin oddviti Röskvu í Stúdentaráði. Samkvæmt fréttatilkynningunni leggur María áherslu á að Röskva haldi áfram að vera hreyfing allra stúdenta og halda áfram að sinna raunverulegri hagsmunabaráttu

„Jafnrétti til náms er og verður rauði þráðurinn í allri stefnu Röskvu – það er kjarninn í því sem við stöndum fyrir og það sem sameinar okkur,“ segir María.

Ný stjórn Röskvu tekur nú við keflinu af fráfarandi stjórn og segir í fréttatilkynningunni að hún stefni á kraftmikið starfsár með áherslu á málefnastarf, samstöðu og áframhaldandi baráttu fyrir réttindum stúdenta. Maggi Snorra, fyrrum stúdentaráðsliði Röskvu, var heiðraður á fundinum með blómvönd fyrir hans framtak í hagsmunabaráttu stúdenta og fyrir störf hans í grasrót félagsins.

Nýkjörin stjórn Röskvu:

● Ármann Leifsson, forseti

● Soffía Svanhvít Árnadóttir, varaforseti

● Hekla Jónsdóttir, ritari

● Helgi James Price, gjaldkeri

● Valeria Bulatova, ritstýra

● Auður Aþena Einarsdóttir, markaðsstýra

● Ríkharður Daði Ólafsson, skemmtanastjóri

● Þorbjörg Edda Valdimarsdóttir, kynningarstýra

● Katla Ólafsdóttir, kosningastýra

● Abdullah Arif, alþjóðafulltrúi

● Styrmir Hallsson, meistarafulltrúi

● Jón Karl Ngoshanthiah Karlsson, meðstjórnandi

Á myndinni má sjá eftirfarandi stjórnarmeðlimi:

Efri: Styrmir Hallsson, Ríkharður Daði Ólafsson, Helgi James Price og Jón Karl Ngoshanthiah Karlsson. Neðri: Auður Aþena Einarsdóttir, Hekla Jónsdóttir, Valeria Bulatova, María Björk Stefánsdóttir, Ármann Leifsson, Soffía Svanhvít Árnadóttir, Þorbjörg Edda Valdimarsdóttir og Katla Ólafsdóttir.