Rithöfundurinn Andri Snær Magnason er allt annað en ánægður með rútufyrirtæki sem auglýsir ferðir á Keflavíkurflugvöll frá Skógarhlíð.

Á sama tíma og misbrestur er í rútusamgöngum hefur Isavia ráðlagt fólki að panta bílastæði fyrirfram um páskana.

Andri Snær varð fyrir því óláni að mæta í Skógarhlíðina snemma morguns til að taka rútu til Keflavíkur samkvæmt plani. Rútan hins vegar mætti ekki og hafði Andri Snær aðeins eitt um starfsmenn fyrirtækisins að segja, kallaði hann þá apaheila, í Facebook-færslu sem hann birti í dag í hópnum Bakland ferðaþjónustunnar:

„Ætlaði að taka þessa rútu hér til Keflavíkur frá Skógarhlíð, skv plani færi rútan kl 5, (hentaði betur Flybus 4:30 og 5:30 hjá BSí) Kem þangað og allt er óvenju tómlegt. Þá er bara engin rúta í förum og engin tilkynning um það á vefsíðunni. Apaheilar.“

Margir tóku undir færslu Andra Snæs og kvörtuðu sáran yfir þjónustuleysinu. Einn þeirra, Ingimar Eydal skrifaði: „Eina landið í veröldinni þar sem þú þarft eiginlega að vera skyggn til að vita hvernig þú átt að komast til og frá alþjóðaflugvellinum ef þú ætlar að nota einhvers konar almenningssamgöngur...“

Skortur á bílastæðum á Keflavíkurflugvelli

Varðandi Keflavíkurflugvöll þá sendi Isavia frá sér fréttatilkynningu í dag þar sem fólk er ráðlagt að bóka bílastæði fyrirfram á flugvellinum um páskana.

Þar segir að búist sé við mikilli umferð um Keflavíkurflugvöll um komandi páska en frá og með fimmtudeginum 10. apríl næstkomandi og fram yfir páska er ekki hægt að leggja bílum á betri og almennum stæðum, P1 og P3 við flugvöllinn án þess að búið sé að bóka þau fyrirfram á vef KEF.

„Fyrirsjáanlegt er að bílastæðin verði fullnýtt fyrir og yfir hátíðarnar og því er þetta gert til að tryggja að farþegar sem eiga bókuð stæði fái þau. Það er mikilvægt að benda farþegum á að frá fimmtudeginum næsta verður ekki hægt að fá bílastæði á P1 og P3 nema þau séu bókuð.

Bókunarkerfið vefsíðu Keflavíkurflugvallar tryggir farþegum stæði um páskana. Ferðalöngum sem ekki eru með bókuð bílastæði er bent á aðra samgöngumáta til og frá KEF,“ segir meðal annars í fréttatilkynningunni.