Dæmi eru um að ferðamenn trufli jarðarfarir í kirkjunni í Vík í Mýrdal. Systkini, sem voru að jarða föður sinn, segja frá ótrúlegum ágangi ferðamanna við athöfnina, í viðtali við Heimildina.

Í nýju blaði Heimildarinnar er fjallað um ýmsar skuggahliðar ört vaxandi ferðamannastraums á Íslandi. Áhrifin af áganginum þekkir fólk í Vík í Mýrdal vel.

Systkini sem ólust upp í Vík í Mýrdal þurftu að standa í því að bægja burt ferðamönnum þegar þau héldu jarðarför föður síns í Víkurkirkju í síðasta mánuði, þar sem rútubílstjóri hafði sleppt þeim út við kirkjuna við upphaf athafnarinnar. Ferðamennirnir tóku myndir af syrgjandi aðstandendum, fóru höndum um íslenska fánann, sem dreginn hafði verið í hálfa stöng, og reyndu að komast inn í athöfnina sjálfa.

Vanalega sér björgunarsveitin í Vík um að loka veginum að kirkjunni, en hún var í þetta sinn bundin í öðrum verkefnum og seinkaði.

Hrefna Sigurjónsdóttir lýsir þeim sem „algerlega stjórnlausum“ í viðtali við Heimildina. Þeir hafi komið sér fyrir við fánastöngina og líkbílinn til að taka myndir. Hún segir að til að byrja með hafi það farið sérstklega öfugt ofan í þau að það var verið að toga í fánann sem var dreginn í hálfa stöng. „Ekki nóg með að verið sé að stilla sér óviðeigandi upp fyrir myndatökur inni í lífi annars fólks á þeirra viðkvæmustu stund heldur þarf að káfa, toga og teygja.“

Kona sem var í hópnum reyndi að fara inn í kirkjuna. Hrefna stóð í kirkjudyrunum og segir að konan hafi otað að henni þrífæti fyrir myndavél sem hún var með. „Þarna er búið að bera kistuna inn í kirkju og verið að æfa sönginn. Konan var að gera sig líklega til að koma inn í kirkjuna þegar ég stöðvaði hana,“ segir hún við Heimildina.

Konan sinnti ekki boði um að hverfa frá. „Ég sagði að það væri að byrja jarðarför og að hún mætti ekki koma inn.“ Konan hafi hins vegar ekki skilið ensku og ætlað að halda áfram inn í kirkjuna. „Það endar með því að ég þurfti að setja lófann beint fyrir framan andlitið á henni og skipa henni að fara, segja, No! Go Away, mjög ákveðið. Þá tók hún þrífótinn saman og fór.“

Í umfjöllun Heimildarinnar kemur fram að fjöldi ferðamanna á Íslandi nálgist hraðbyri þrjár milljónir á ári. Þar er nánari lýsing á atburðunum í Vík og fleiri tilvikum sem varða ágang og álag af fjöldaferðamennsku á Íslandi.