Í dagbók lögreglu frá því í nótt og í gær er greint frá því að tilkynnt hafi um að bifreið hafi verið ekið eftir gangstíg og vísvitandi á hjólreiðamann og reiðhjól hans í Grafarvogi. Lögregla ræddi bæði við hjólreiðamanninn og ökumann bifreiðarinnar og var þar orð gegn orði um atburðarásina. Hjólreiðamaðurinn slasaðist ekki og hjólið virtist óskemmt. Málið er til rannsóknar.

Tilkynnt var um ungmenni vopnuð hnífi á gangi um miðbæinn. Lögregla leitaði þeirra í kjölfarið, en aðilarnir fundust ekki. Aðeins barst ein tilkynning um ungmennin og því dró lögregla úr viðbragði þegar ekkert spurðist frekar til þeirra.

Ökumaður var handtekinn grunaður um ölvunarakstur á sendibifreið í Breiðholti, en sá blés 2,27‰ sem er verulega mikið. Maðurinn var látinn laus að lokinni blóðsýnatöku.