Fallhlífastökkvarinn Jade Damarell lést með hörmulegum hætti eftir að hafa fallið 10.000 fet úr flugvél án þess að opna fallhlíf sína. Lögreglan telur nú að um sjálfsvíg hafi verið að ræða, eftir að hafa fundið skilaboð sem hún hafði skilið eftir fyrir stökkið.

Jade, sem var 32 ára gömul, hafði lokið yfir 400 vel heppnuðum stökkum áður en hún lést síðastliðinn sunnudag er hún féll til jarðar úr 10.000 feta hæð.

Upphaflega var talið að atvikið væri hörmulegt slys, en fallhlífafélagið hennar SkyHigh Skydiving staðfesti síðar að lögreglan hefði upplýst þau um að Jade hefði vísvitandi valið að opna ekki fallhlífina. Bréf fannst sem sýndi fram á áform hennar.

Nigel Wreford, 56 ára starfsmaður á bóndabæ, sem býr nálægt vettvangi slyssins í Peterlee í County Durham, sagði í samtali við Mirror: „Ég hef heyrt frá nokkrum að hún hafi vitað hvað hún var að gera, hún átti víst að hafa skilið eftir kveðjubréf.“

Nigel rifjaði upp augnablikið þegar annar fallhlífastökkvari, sem hafði verið með Jade í stökki hennar, kom örmagna og í áfalli að heimili hans.

„Það er óhugsandi hversu skelfilegt þetta hlýtur að hafa verið,“ bætti hann við. „Hann var mjög ringlaður og gat varla tjáð sig. Þetta er hræðilegt. Ég get ekki hætt að hugsa um stúlkuna og fjölskyldu hennar.“

Vinur Jade staðfesti einnig grun lögreglu og fallhlífadeildarinnar: „Þetta var ekki slys. Við trúum því miður að hún hafi ætlað sér að binda endi á líf sitt. Hún kaus að opna ekki fallhlífina og lenti á bakinu.“

SkyHigh Skydiving sendi frá sér yfirlýsingu þar sem þau sögðu:

„Það er með mikilli sorg sem við staðfestum að hörmulegt atvik átti sér stað 28. apríl 2025, sem varð meðlimi í samfélagi okkar að bana. Öll merki frá lögreglu og British Skydiving benda til þess að þetta hafi verið vísvitandi gjörð til að binda endi á eigið líf.

Þessar hörmungarfréttir hafa haft djúpstæð áhrif á alla sem þekktu hana og hugur okkar er hjá fjölskyldu hennar og vinum á þessum ósegjanlega erfiða tíma. Við biðjum um frið og samkennd fyrir þá sem syrgja.“

Þau bættu við: „Ef þú ert að glíma við erfiðleika eða tilfinningalega vanlíðan, þá skaltu vita að þú ert ekki einn. Hjálp er til staðar. Við hvetjum alla í neyð að tala við einhvern eða leita til fagaðila í geðheilbrigðismálum. Jafnvel í myrkustu stundum er til von og stuðningur.“

Viðbragðsaðilar komu á vettvang nálægt Wrefords Farm í County Durham en ekki tókst að bjarga henni og hún var úrskurðuð látin á staðnum.

Ljóst er að rannsókn mun fara fram þar sem málið hefur verið fært til dánardómara.

Í þessari grein er fjallað um sjálfsvíg. Fólki með sjálfsvígshugsanir er bent á upplýsingasíma heilsugæslunnar s.1700, netspjallið heilsuvera.is, Hjálparsíma Rauða krossins s.1717, á netspjallið 1717.is og á Píeta símann s.552-2218. Þau sem misst hafa ástvin í sjálfsvígi er bent á stuðning í Sorgarmiðstöð s. 551-4141, upplýsingasíma heilsugæslunnar s.1700, netspjallið heilsuvera.is og á Píeta símann s.552-2218.