Talsmaður UNICEF, James Elder, sem dvelur nú á Gaza, lýsti „hryllingnum“ sem hann varð vitni að á aðeins 24 klukkustundum.

Í samtali við Al Jazeera frá al-Mawasi sagði Elder að spítalar og götur á Gaza væru fullar af vannærðum börnum. „Ég sé unglingsdrengi í tárum, sýna mér rifbeinin,“ sagði hann og bætti við að börn væru að betla um mat.

Hann lýsti örvæntingu fólks sem gengur kílómetra til hjálparstöðva, þrátt fyrir að vita að þar hafi nýverið átt sér stað „fjöldamorð“.

„Ímyndaðu þér að vita að fjöldamorð hafi átt sér stað en vera samt svo örvæntingarfullur að þú ferð samt þangað til að reyna að fæða fjölskylduna þína,“ sagði Elder og gagnrýndi Mannúðarsjóð Gaza, sem nýtur stuðnings Ísraels og Bandaríkjanna, fyrir að gera illt verra: að styðja við ofbeldið og hætta svo starfsemi án þess að skila nægri aðstoð.

Röð vísvitandi ákvarðana

Tom Fletcher, mannúðarstjóri Sameinuðu þjóðanna, segir að röð „vísvitandi ákvarðana“ hafi svipt yfir tvær milljónir manna lífsnauðsynlegri aðstoð á Gaza-ströndinni.

„Opnið öll landamærahliðin. Hleypið lífsnauðsynlegum hjálpargögnum inn í miklu mæli, úr öllum áttum. Afnumið takmarkanir á hvað og hversu mikið við getum flutt inn. Tryggið að bílalestir okkar verði ekki fyrir töfum eða verði hafnað,“ sagði hann.

„Sleppið gíslunum. Innleiðið vopnahlé. Leyfið okkur að vinna.“