Lögregluyfirvöld í nokkrum löndum hafa afhjúpað alþjóðlegan eiturlyfjasmyglhring sem smyglaði „miklu magni“ af kókaíni frá Brasilíu og Kólumbíu til Kanaríeyja, en spænska lögreglan greindi frá því fyrr í dag.

Talið er að glæpagengið hafi notað ellefu hraðbáta til að sækja eiturlyfin frá stærri „móðurskipum“ á mismunandi stöðum í Atlantshafi og síðan flutt þau til eyjaklasans, sem er staðsettur undan norðvesturströnd Afríku, að því er fram kemur í yfirlýsingu lögreglu.

Samkvæmt yfirlýsingunni er talið að þetta hafi verið „ein stærstu glæpasamtökin sem hafa stundað kókaínsmygl frá Suður-Ameríku til Kanaríeyja“ með þessum hætti. Lögreglan handtók 48 manns í aðgerðinni.

Yfirvöld hafa hingað til á þessu ári lagt hald á nær 3.800 kíló af kókaíni sem samtökin voru að smygla, ásamt 19 bátum og um 100.000 evrum sem tilheyrðu glæpasamtökunum.

Lögregluyfirvöld í Kólumbíu, Frakklandi, Portúgal, Póllandi og Grænhöfðaeyjum tóku einnig þátt í aðgerðinni.

Spánn er mikilvæg leið fyrir eiturlyfjasmygl til Evrópu vegna tengsla sinna við fyrrverandi nýlendur í Suður-Ameríku og nálægðar sinnar við Marokkó, sem er einn stærsti framleiðandi kannabis í heiminum.