Orri Harðarson er látinn eftir að hafa háð harða og erfiða baráttu við krabbamein.

Orri var frábær tónlistarmaður og rithöfundur, mikill hæfileikamaður.

Hann vakti fyrst athygli í Músíktilraunum með hljómsveitinni Óþekktum andlitum frá Akranesi, heimabæ sínum. Einnig lék hann með Tregablandinni lífsgleði sem og öðrum sveitum frá Akranesi.

Orri kom víða við á sinni ævi enda hæfileikamður af Guðs náð. Hann spilaði á mörgum plötum annarra, auk þess sem hann annaðist upptökustjórn og útsetningar.

Orri var leikinn með pennann og gaf út nokkrar skáldsögur, til að mynda Endurfundir og Stundarfró.

Orri tjáði sig um veikindin í vor:

„Eftir tíðar inndælingar krabbameinslyfja síðan í janúar er víst nóg komið. Tímabært að leyfa líkama og sál að jafna sig; þiggja aðeins líknandi meðferð og leitast við að gera einhvers konar lífsgæði úr restinni.“

Orri vissi sem var að orrustan var töpuð:

„Rannsóknir sýna enda að ekki verður lengur við neitt ráðið. Ég hyggst verja tímanum sem eftir er í ró og næði. Biðst því undan miklum samskiptum, umfram mína allra nánustu. Þetta á líka við um skilaboðaskjóðu FB. Hef afskaplega litla orku í slíkt. Það gildir raunar um flest, nú um stundir. Ást og kærleikur til ykkar.“

Orri, sem var fæddur árið 1972, lætur eftir sig tvær dætur.