Lagt var hald á töluvert magn af ætluðum fíkniefnum og nokkrar milljónir í reiðufé við húsleit í íbúð í miðborginni fyrr í vikunni en greint er frá þessu í tilkynningu frá lögreglunni.

Húsráðandi, karlmaður á fertugsaldri, var handtekinn í þágu rannsóknarinnar, sem miðar vel að sögn lögreglu.

Lögreglan tók einnig í sína vörslu síma og tölvur húsráðanda, auk vegabréfs óskylds aðila, en það fannst einnig á vettvangi. Grunur leikur á að reiðuféð, sem samanstóð af bæði íslenskum og erlendum seðlum, sé tilkomið vegna sölu fíkniefna.

Þá hvetur lögreglan almenning að hafa samband nafnlaust í síma 800 5005. Í hann má hringja til að koma á framfæri upplýsingum um skipulagða brotastarfsemi, eða önnur brot sem fólk hefur vitneskju um.