Hafsteinn Jóhannsson, ævintýramaður og kafari, er látinn. Hann var 89 ára en mbl.is greindi frá andláti hans.

Hafsteinn fæddist á Akranesi árið 1935. Hann byrjaði ungur að stunda sjómennsku en fluttist um tvítugt til Noregs þar sem hann kemst í kynni við köfun.

Þegar hann snéri aftur til Íslands sinnti hann köfun og kom mörgum fiskiskipum til aðstoðar með hæfileikum sínum. Hann flutti svo til Noregs árið 1973 og hóf störf í álveri þar til hann settist í helgan stein.

Hafsteinn vakti mikla athygli árið 1990 og 1991 þegar hann sigldi einn umhverfis jörðina á seglskútu sem var heimasmíðuð. Hann var fyrstur Íslendinga til að afreka slíkt. Bókin Hafsteinn á Eldingunni, sem var um siglingu hans, kom svo út árið 1993.

Hann var ógiftur og barnlaus.