Nokkrum kylfingum brá heldur betur í gær þegar flugvél neyddist til að nauðlenda örfáum metrum frá því sem þeir voru að spila og náðist myndband af atvikinu.

Atvikið átti sér stað um klukkan 13:00 á hinum goðsagnakennda Riviera golfvelli í Los Angeles. Flugvél, sem hafði tilkynnt um vélavandamál, neyddist til að lenda á einni braut vallarins. Í myndbandinu sést vélin skoppa á og renna eftir grasinu áður en hún stöðvar við sandgryfju á vellinum.

Samkvæmt upplýsingum frá slökkviliði Los Angeles voru þrír um borð í vélinni þegar þetta gerðist en enginn slasaðist í nauðlendingunni.

Vélin átti upphaflega að lenda á Santa Monica flugvelli, sem er um það bil tíu kílómetra frá golfvellinum, en beygði út af leið vegna vélarvandamála.

Þetta er ekki í fyrsta skipti sem flugvél lendir óvænt á golfvelli í Los Angeles. Í desember 2024 hrapaði vél niður á Victoria golfvellinum en líkt og í atvikinu í gær sluppu allir um borð ómeiddir.