Jón Þór Hauksson er hættur sem þjálfari ÍA í Bestu deild karla í fótbolta, en liðið situr í botnsæti deildarinnar. Með 9 stig eftir 11 leiki.

Þessi tíðindi af Jóni Þóri koma fram í tilkynningu frá knattspyrnudeild ÍA. Segir þar að ákvörðun um starfslokin hafi verið tekin í sameiningu af Jóni Þóri og stjórn knattspyrnudeildar félagsins, en hann tók við þjálfun ÍA árið 2022.

Liðið endaði í fimmta sæti Bestu deildarinnar í fyrra; var lengi vel í baráttu um Evrópusæti, sem hafðist þó ekki.

Hins vegar hefur gengið upp og ofan í sumar á Íslandsmótinu, og 4-1 tap gegn Aftureldingu í gærkvöld var kornið sem fyllti mælinn.

Ákvörðun var tekin að skipta um þjálfara.

Ekki kemur fram í fréttatilkynningunni hver það sé sem tekur við stjórn liðis, en Dean Martin aðstoðarþjálfari hefur stýrt ÍA í tveimur leikjum í sumar er Jón Þór tók út leikbann og því ekki talið ólíklegt að Dean Martin taki við þjálfun liðsins.

Fréttatilkynning ÍA:

Knattspyrnufélag ÍA tilkynnir að Jón Þór Hauksson hefur látið af störfum sem þjálfari meistaraflokks karla.

Ákvörðunin var tekin í samráði milli Jóns Þórs og stjórnar félagsins. Jón Þór tók við þjálfun liðsins þann 1. febrúar 2022 og hefur gegnt starfinu af ábyrgð og festu á þeim tíma sem hann hefur verið hjá félaginu.

Bæði hann og stjórn félagsins voru sammála um að nú væri rétt að gera breytingar, með hagsmuni liðsins og framtíðaruppbyggingu að leiðarljósi.

„Ég vil þakka Knattspyrnufélagi ÍA fyrir samstarfið síðustu ár. Það hefur verið mér bæði lærdómsríkt og ánægjulegt að starfa með leikmönnum og starfsfólki félagsins. Ég óska liðinu og öllum sem að því koma góðs gengis í framtíðinni.“

ÍA þakkar Jóni Þór fyrir samstarfið og óskar honum velfarnaðar í næstu verkefnum.

Stjórnin hefur hafið undirbúning að ráðningu nýs þjálfara og verður tilkynnt um framhaldið þegar það liggur fyrir.

F.h. stjórnar Knattspyrnufélags ÍA,

Eggert Herbertsson, formaður.